Abusong dulot ng militarisasyon
Abusong dulot ng militarisasyon
February 2, 2022
Sa isang press conference noong Enero 21, binalita ng pamilya ng menor de edad mula Quezon Province na nagsampa sila ng kaso ng pang-aabuso sa miyembro ng CAFGU at mga militar.
By Jan Terence
“Sapat na ang pananahimik natin. Panahon na para tumindig tayo at singilin ang hustisya. Di lang tayo ang nakaranas ng ganito. Panahon na para singilin sila sa mga pambababoy na ginagawa nila sa atin.”
Ito ang mensahe ng isang menor de edad mula sa probinsya ng Quezon na biktima ng kidnapping, tortyur, interogasyon at panggagahasa.
Ayon kay Belle, hindi niya tunay na pangalan, isinakay siya sa isang puting van noong Hulyo 20, 2020 ng mga sundalo mula sa 59th Infantry Battalion. Katatapos lang sana niya bumili sa tindahan, pero bunga ng pagkakadakip, ikinulong siya mula Hulyo 27 hanggang Agosto 13, 2020.
Sa isang press conference nitong Enero 21, dumulog si Belle at ang kanyang ina na si Ofel sa iba’t ibang organisasyong pangkababaihan at grupong nagsusulong ng karapatang pantao. Nagsalita siya laban sa mga abusong naranasan niya at ng kanyang pamilya sa kamay ng militar sa mga nagdaang taon. Pilit umanong pinapaamin bilang rebelde ang pamilya nilang mga magsasaka.
Nagsampa sina Belle ng kasong kidnapping, serious illegal detention with rape, violence against women and children, at child abuse laban kay Leoven Julita, miyembro ng Citizen Armed Force Geographical Unit na paulit-ulit na gumahasa sa menor de edad.
Comments (0)